گاڤ

سەرۆکێ ئەمریکا د سەرەدانا خۆ یا بۆ دەوحەیا پایتەختێ قەتەرێ دا بەحسی چیرۆکا هاتنا خۆ یا ب دزیڤە بۆ ئیراقێ دکەت و دبێژیت: مە پەردە دانە بەر پەنجەرەیێن فرۆکەیێ و رۆناهییێن وێ ڤەمراندن و ب رێکەفتین.

دۆنالد ترەمپ، سەرۆکێ ئەمریکا، ئەڤرۆ ل دەوحەیا پایتەختێ قەتەرێ و ل بارەگەهێ عودەیدە یێ ئەمریکی گۆتارەک پێشکێشکر و بەحسی هاتنا خۆ یا ب دزیڤە یا دویماهییا سالا 2018ـێ بۆ ئیراقێ کر ئەوا کو کۆچکا سپی د بەیانا خۆ دا بەحسکری و تێدا گۆتی؛ ترەمپ و مێلینایا هەڤژینا خۆ بۆ پیرۆزکرنا سەرسالێ چوونە ئیراقێ و سەرا لەشکەرێ ئەمریکا دا.

لێ ترەمپی ب رەنگەکێ دی چیرۆک ڤەگێرا و گۆت: من ڤیا ب دزیڤە بچمە ئیراقێ و ل گەل جەنەرالەکێ ئەمریکی کۆمببم و بزانم کا بۆچی هەرفاندنا خیلافەتا داعشێ هندە گیرۆبوویە.

ترەمپ چیرۆکێ ڤەدگێریت و دبێژیت: هندەک جەنەرالێن ئەمریکی گۆتبوو من: ئەم پێدڤی ب 5 سالاینە هەتا بشێین داعشێ تێکببەین، ئەز تۆرە بووم و من ڤیا ڤێ چەندێ ژ ناڤەندێن سەربازی یێن مە یێن نێزیکی داعشێ بزانم.

ترەمپ دبێژیت: من تشتەکێ وەسا کر کو بەری نوکە قەت پێ رانەببووم. دەمژمێر 3:00 سپێدێ چووینە فرۆکەخانەیا
ئەیرفۆرس وانێ و مە بۆ ئیراقێ دا رێ و بێی کەس بزانیت کا دێ کیڤە چم.

سەرۆکێ ئەمریکا ب چیرۆکێ دا دچیت و دبێژیت: ژ من هاتە خواستن، دەمێ فرۆکە ل سەر ئەسمانێ دوژمنی را دەرباز دبیت، دێ رۆناهییێن فرۆکەیێ هێنە ڤەمراندن و پەردە کەڤنە بەر پەنجەرەیان. من تشتەک نەددیت، نە رۆناهییەک نە تشتەک هەبوو، نە رێک دهاتە دیتن، من نەزانی کا چەوا وان فرۆکە دهاژۆت.

ترەمپ دبێژیت: هەتا ئەم گەهشتی من جەنەرالەک دیت ب ناڤێ رەیزان کێن، من گۆتێ: ئەز حەز ژ تە دکەم، تو ئەوی یێ ئەز لێ دگەرم. پشتی دانوستاندنان، من زانی ئەوا ئەڤ جەنەرالە دبێژیت و یا جەنەرالێن دی یێن ل ئەمریکا دبێژن یا ژ ئێک جودایە.

ترەمپ ڤێرا دچیت و دبێژیت: وی گۆتە من؛ نە ئەزبەنی، ئەگەر تو دەستهەلاتێ بدەیە من کو ئەم ب کویری بچینە ناڤ جەرگێ داعشێ، دێ د هەیاما سێ حەفتییان دا، خیلافەتا وان هەڕفینین.

هەروەسا دبێژیت؛ ستراتیژیەتا ئەمریکا بۆ وێ دەمی ب وی رەنگی بوو کو ژ بارەگەهێن دویر هێرش ل سەر داعشێ بهێتەکرن. ئەڤێ چەندێ ژی گەلەک سۆتەمەنییا فرۆکەیان ب هەدار ددا و هێرش بێ کاریگەری دمان. جەنەرالی گۆتە من؛ ئەم دشێین بارەگەهێن ل ئیراقێ و سووریێ بکاربئینین لێ دێ ئەڤ چەندە بیتە ئەگەرێ تۆرەبوونا وان، من ژی گۆتێ: ئەم ب ملیاران دۆلاران ددەینە وان، بلا هەر تۆرە ببن.

ترەمپ دبێژیت: پشتی دەمەکی من پلانا جەنەرالی پەسەندکر و من گۆتێ؛ دێ هەرە بابۆ جەنەرال، دەستپێ بکە. وی دەست ب لێدانا داعشێ کر و مە د دەمەکێ کورت دا 100٪ خیلافەتا وان هەڕفاند.

ترەمپی ل 26ـێ کانوونا 2018ـێ ب دزیڤە سەرەدانا ئیراقێ کرەبوو و ئەڤێ چەندێ د مەیدانا سیاسی یا ئیراقێ دا کارڤەدانێن مەزن دروست کرن و نەرازیبوون ب دویڤ خۆ را ئینا و وەکی بێ-رێزیەکێ بەرانبەری ئیراقێ هاتە دیتن.

پشتی سەرەدانا ترەمپی، ب سێ هەیڤان و گرتنا باژارۆکێ باخۆزێ یێ ل سەر سنۆرێن ئیراق و سووریێ ژ ئالییێ هەسەدێ ڤە، هەڕفینا خیلافەتا داعشێ هاتە راگەهاندن.