گاڤ

وەزارەتا گەنجینەیا ئەمریکا، ب رێیا نڤیسینگەها کۆنترۆڵکرنا سەرمایەیێن بیانی ل پێلەکا نوی یا سزایان وەک پشکەک ژ هەوا "تۆرەییا ئابۆری" راگەهاند. ئەڤ گاڤە ب دیاریکری بەرپرسێن حکومی و بازرگانی ل ئیراق و ئیرانێ دکەتە ئارمانج کو دەست د "تالانکرنا" پەترۆلا ئیراقێ دا هەبوویە بۆ بەرژەوەندییا تەهران و گرۆپێن چەکدار.

پێنجشەمبییێ 7ێ گولانا 2026ێ، سکۆت بێسێنت، وەزیرێ گەنجینەیا ئەمریکا د لێدوانەکا توند دا راگەهاند: "رژێما ئێرانێ وەک تاقمەکا یاخی، مژویلی تالانکرنا وان ژێدەرانە کو مافێ رەوا یێ گەلێ ئیراقێ نە. وەزارەتا گەنجینەیێ بێدەنگ نابیت ل هەمبەر وێ چەندێ کو سوپایێ ئیرانێ پەترۆلا ئیراقێ بۆ دابینکرنا داراییا تیرۆرێ ل دژی ئەمریکا و هەڤپەیمانێن مە بکاربئینیت."

ئەمریکا د ڤێ بریارێ دا تبلا تۆمەتێ بۆ بلندترین ئاستێ وەزارەتا پەترۆلا ئیراقێ درێژ دکەت و و راگەهاند "عەلی مەعاریج بەهادلی"، بریکارێ وەزیرێ پەترۆلا ئیراقێ بۆ کاروبارێن دابەشکرنێ، ئێخستیە د لیستا سزایان دا. ب گۆتنا گەنجینەیا ئەمریکا، مەعاریج پۆستێ خۆ ب دەلیڤە دیتییە بۆ ئاسانکارییێ د قاچاخییا پەترۆلێ دا بۆ بەرژەوەندییا ئیرانێ و گرۆپێن چەکدار.

هویرکاتییێن گەندەلییا پەترۆلێ ل ئیراقێ ب ڤی رەنگی نە:

1- پەیوەندی ل گەل قاچاخچیان: مەعاریج هاریکارییا سەلیم ئەحمەد سەعید (قاچاخچییەکێ ناسیار یێ سەر ب ئێرانێ ڤە) کریە. سەلیم سەعید ل سالا 2025ێ وەرە سزادایە، تۆرەکا کۆمپانییان هەبوویە کو پەترۆلا ئیرانی وەک "پەترۆلا ئیراقی" فرۆشتییە دا کو ژ سزایان رزگار ببن.

2- تالانکرنا کێلگەها گەیارە: مەعاریج رێ دایە رۆژانە ب بهایێ ملیۆنان دۆلاران پەترۆل ژ کێلگەها گەیارە ب تانکەران بۆ کۆمپانیا (VS Oil) ل دەڤەرا خۆر زوبەیر بهێتە ڤەگوهاستن، ل وێرێ پەترۆلا ئیرانی و ئیراقی تێکهەل کرینە و ب بەلگەنامەیێن سه‌خته‌ وەک پەترۆلا پاقژ یا ئیراقی هناردەیی بازارێن جیهانێ کرینە.

ئەمریکا سێ سەرکردەیێن بلند یێن گرۆپێن (عەسائیب ئەهلولحەق) و (کەتائیب سەیدولشوهەدا) سزادان:

  ● موستەفا هاشم لازم بەهادلی (سەید عەون): بەرپرسێ ئابۆری یێ عەسائیب؛ تۆمەتبارە ب وێ چەندێ پشتی سالا 2011ێ یەکەیەکا ئەمنی و ڤەگوهاستنا پەترۆلێ بۆ عەسائیب چێکرییە. عەون سەرپەرشتییا دزینا سۆتەمەنییێ و پرۆژەیێن مەزن یێن پیشەسازییێ کرییە وەک پەردەیەک بۆ چالاکییێن داراییا عەسائیب، هەروەسان ئێکسەر ل گەل فەیلەقا قودس هەماهەنگی کرییە.

 ● ئەحمەد خوزەیر مەخسووس: جێگرێ پێشتر یێ ئەمیندارییا گشتی یا کەتائیب سەیدولشوهەدا.

 ● محەممەد عیسا کازم شوێلی (ئەبو مەریەم): بەرپرسەکێ بلند یێ کەتائیب سەیدولشوهەدا؛ تۆمەتبارە کو ل سالا 2025ێ وەرە ئێکسەر ل گەل تیما داراییا حزبوللا یا لوبنانی کار کرییە بۆ کڕین و گەهاندنا چەکی بۆ ئیراقێ.

کۆمپانیێن ئیراقی یێن سزادای: چار کۆمپانییێن ئیراقی کو ل ژێر کۆنترۆڵا (موستەفا بەهادلی) دانە هاتنە سزادان، ئەو ژی:

1.  کۆمپانیا کەنداڤ بۆ خزمەتگۆزارییێن پەترۆلی (Gulf Energy Oil Services Limited).

2.  کۆمپانییا کەنداڤ بۆ بەلێندەراییا گشتی (Gulf General Contracting Limited).

3.  کۆمپانیا وزەیا ناڤدەولەتی یا ئیراقێ (Iraq International Energy).

4.  کۆمپانیا کەنداڤ بۆ ڤەگوهاستنا گشتی و خزمەتگۆزارییێن دەریایی (Gulf Energy for General Transport).

وەزارەتا گەنجینەیا ئەمریکا راگەهاند کو دێ د سیاسەتا "بلندترین فشار" دا بۆ سەر ئیرانێ بەردەوام بیت و گاڤێن ئەمریکا ل دژی ئیرانێ ب ڤی رەنگی نە:

● ژکارئێخستنا داهاتی: واشنتۆن شیایە رێگرییێ ل گەهشتنا ملیاران دۆلارێن داهاتێ پەترۆلێ بۆ تەهرانێ بکەت.

● دراڤێن دیجیتالی: نێزیکی 500 ملیۆن دۆلارێن دراڤێ دیجیتال (Cryptocurrency) یێن سەر ب رژێما تەهرانێ ڤە هاتینە بلۆککرن.

● بەنکێن سببەر: هێرشەکا دژوار کریە سەر "بەنکێن سیبەر" یێن تەهرانێ ل جیهانێ.

● هوشداری بۆ چین: هوشداری دایە پالاوتگەهێن بچویک یێن چینێ (Teapot) کو پەترۆلا ئیرانێ دپالێون.

● دۆرپێچا دەریایی: ئیدارەیا ترەمپی ب رێکا دۆرپێچا دەریایی رێ ل داهاتێ ئیرانێ گرتییە.

ئەنجامێن ڤان سزایان دێ چ بن؟

ل گۆرەیی بڕیارێ، هەمی دارایی و مۆلک و مالێ ڤان کەس و کۆمپانییان ل ئەمریکا یان ل ژێر دەستهەلاتا وەلاتییێن ئەمریکی دا بن، دێ هێنە بلۆککرن. هەر مامەلەیەک ل گەل وان دێ بیتە ئەگەرێ سزایێن مەدەنی و تاوانکاری یێن گران. هەروەسان ئەمریکا راگەهاند کو هەر کەسەک زانیارییێن دروست بدەتە تۆرا (FinCEN) ل سەر شکاندنا سزایان، دێ خەلاتەکێ دارایی یێ مەزن وەرگریت.