گاڤ

قەرێن ناڤخۆیی یێن ئیراقێ ژ 96 ترلیۆن دیناران دەربازبووینە و قەرێن دەرەکی ژی ژ 10 ملیار دۆلاران دەربازبووینە، ل گۆره‌یی داتایێن وەزارەتا دارایی یا فیدرال، هێشتا نێزیكی 3 ملیار دۆلارێن قەرێن بەری سالا 2003ێ ل سەر ئیراقێ ماینە.

میدیا فەرمی یا ئیراقێ كورتەییەک ژ راپۆرتەكا وەزارەتا دارایی یا فیدرال بەلاڤ كرییە كو تایبەتە ب كوژمێ قەرێن ناڤخۆیی و دەرەکی هەتا 30ێ نیسانا بۆری. ئەو راپۆرتە ژ ئالییێ فەرمانگەها قەرێن گشتی یا سەر ب وەزارەتا دارایی ڤە هاتییە بەرهەڤکرن و بەحس ل قەران دكەت ژ سالا 2023ێ وەرە.

سەرجەمێ قەران د وی دەمی دا 46 ترلیۆن و 35 ملیار دینار بووینە. ل گۆره‌یی سالان، قەرێ سالا 2023ێ گەهشتییە 7.5 ترلیۆن دیناران، د سالا 2024ێ دا قەر بۆ 17.21 ترلیۆن دیناران زێدە بووینە، پاشی د سالا 2025ێ دا كێم بووینە بۆ 10.8 ترلیۆن دیناران و د مەهێن دەستپێكا ئەڤ سالە ژی دا بووینە 10.5 ترلیۆن دینار.

حكومەتا ئیراقێ وان قەران بۆ پركرنا كێم و کاسییێن خەرجییێن خۆ د دابینكرنا خەرجییێن بكاربرن و وەبەرهێنانێ دا بكاردئینیت.

ل گۆره‌یی راپۆرتێ، وەزارەتا دارایی یا فیدرال شیایە 19.9 ترلیۆن دینار ژ قەران ڤەگەرینیت، ب ڤێ چەندێ قەرێ ناڤخۆیی ل سەر 96 ترلیۆن دیناران مایە، د دەمەكی دا قەرێن کەڤتینە-سەرئێک یێن حكومەتێن پێشتر دناڤبەرا 2022 بۆ 2024ێ دا گەهشتینە 70.5 ترلیۆن دیناران.

دەربارەیی قەرێن دەرەکی، نوكە 10 ملیار و 76 ملیۆن دۆلار ماینە، وەزارەتا دارایی دناڤبەرا 2023 بۆ نیسانا 2026ێ دا، 2 ملیار و 166 ملیۆن دۆلاران قەرێن حكومەتێن پێشتر ڤەگەرینیت.

راپۆرتێ ئاماژە ب وان قەرێن كەڤن ژی دایە یێن بەری سالا 2023ێ ل سەر ئیراقێ هەبوون، وەك قەرێن یانەیا پاریس و قەرێن بازرگانی یێن دی، كو هەتا نیسانا 2026ێ كێمبووینە بۆ 2 ملیار و 963 ملیۆن دۆلاران، د دەمەكی دا قەرێن پرۆژەیێن دەرەکی دناڤبەرا 2022 بۆ 2026ێ دا گەهشتینە 12 ملیار و 926 ملیۆن دۆلاران.