گاڤ

سەرۆکوەزیر مەسروور بارزانی ناڤەرۆکا کۆمبوونا خۆ ل گەل رەجەب تەیب ئەردۆگانی بەلاڤکر

مەسروور بارزانی راگەهاند: ئەڤرۆ ل کۆچکا دۆلمە باخچە ل ستەنبۆلێ ل گەل رەجەب تەیب ئەردۆگان و وەزیرێن دەرڤە، وەزە، بەرگری و بەرپرسێن هەوالگیرییا تورکیا کۆمبووین. مە دۆپاتی ل گرنگییا بهێزکرنا پەیوەندی و هەماهەنگییێ د ناڤبەرا تورکیا و هەرێما کوردستانێ د بوارێن جودا دا کر.

هەروەسا راگەهاند: ئەردۆگانی پەسنا رۆلێ سەرۆک مەسعوود بارزانی و هەرێما کوردستانێ وەک فاکتەرێن گرنگ یێن ئاشتی و ئارامییێ ل دەڤەرێ کر. دۆپاتی ل بدویماهیکئینانا ئالۆزییێن دەڤەرێ و چارەکرنا کێشەیان ب رەنگەکێ ئاشتیانە و رێکا دانوستاندنان هاتەکرن.

بزاڤ و دانوستاندنێن ئالییێن سیاسی یێن ئیراقێ بۆ پێکئینانا کابینەیا نوی یا حکومەتێ هاتنە بەحسکرن.

داخواز هاتەکرن کابینەیا نوی یا حکومەتا فیدرالی ببیتە ئەگەرێ چەسپاندنا ئاشتی و سەقامگیرییێ ل ئیراقێ و خزمەتا هەمی پێکهاتەیان بێ جوداهی بکەت و کێشەیێن د ناڤبەرا هەولێر و بەغدایێ دا ب ئاشتیانە و ل سەر بنەمایێ دەستووری بهێنە چارەکرن.

پرۆسەیا ئاشتی و پرسا چەکدانانا پەکەکێ پشکەکا دی یا دانوستاندنان بوو، مە پشتەڤانییا خۆ بۆ پرۆسەیا ئاشتییێ دۆپاتکر.