گاڤ

ب رێیا پێشنیازەیاسایەکێ، ئیراق دخوازیت کێشانا جگارەیێ، نەرگیلە و ڤەیپان سنۆردار بکەت؛ دێ باجا فرۆتنا پاکیتەکا جگارێ یا 20 دانەیی یان 20 گرام ژ بەرهەمێن تویتنێ کەتە 500 دینار. سەرپێچیکرن ل سەر مادەیێن ڤێ پێشنیازەیاسایێ ژی دێ سزایێ وێ گەهیتە شەش مەهێن زیندانیکرنێ و غەرامەیا پێنج ملیۆن دیناری.

پێشنیازەیاسایا پاراستنێ ژ زیانێن توتنێ، ل 4ـێ گولانێ ل پەرلەمانی خواندنا ئێکێ بۆ هاتییە کرن و نوکە بەرهەڤی بۆ خواندنا دویێ و دەنگدانێ ل سەر دهێنە کرن.

وێ پێشنیازەیاسایێ 28 جهـ دیارکرینە کو کێشانا جگارەیێ و بەرهەمێن تویتنێ تێدا قەدەغەیە، ژ وان: سازییێن دەولەتێ، جهێن ئەهلی، ئاڤاهییێن گرتى، ئالاڤێن ڤەگوهاستنێ، نەخۆشخانە، قوتابخانە و زانکۆ. ئەڤ بەرهەمە سەربارى جگارەیێ، نەرگیلە و ڤەیپان ژی دگریت کو دویکێلێ دکەن.

باجا نوی د ناڤ پێشنیازەیاسایێ دا هاتییە دیارکرن بۆ فرۆشتنا جگارەیێ، بۆ هەر پاکیتەکا 20 جگارەیی یان 20 گرام ژ بەرهەمێن تویتنێ چ یێن ناڤخۆ بن یان یێن ژ دەرڤە دهێن، 500 دینارن.

پێدڤییە د هەیاما 180 رۆژان دا پشتی دەرچوونا یاسایێ، کۆمپانییێن بەرهەمهینەر یان یێن کو بەرهەمێن تویتنێ دئینن، هەمی ریکلامێن خۆ یێن بانگەشەیێ بۆ وان بەرهەمان لابدەن، ئەگەر نە دێ دناڤبەرا دو هەتا پێنج ملیۆن دیناران دا هێنە سزادان.

سزایێن سەرپێچیکرنێ ل ماددەیێن وێ یاسایێ جودانە؛ کێشانا بەرهەمێن تویتنێ ل جهێن قەدەغەکری و نیشاندانا وان بەرهەمان ب رەنگەکێ ئاشکرا بۆ فرۆشتنێ، سزایێ وێ 50 هزار دیناران.

هەر کەسەکێ بەرهەمێن تویتنێ بفرۆشیتە کەسەکێ کو ژییێ وی ل بن 18 سالییێ بیت، سزایێ وی شەش مەهێن زیندانیکرنێ یە یان غەرامەکرنە دناڤبەرا 250 تا 500 هزار دیناران دا، یان ژی هەردو سزا پێکڤە ل سەر دهێنە چەسپاندن.

ریکلامکرن بۆ بەرهەمێن تویتنێ، بکارئینانا وێنەیان بۆ پالدانا بکارئینانێ یان ڤەشارتنا هوشدارییێن ساخلەمییێ دەربارەیی زیانێن وان بەرهەمان، سزایێ وێ دگەهیتە شەش مەهێن زیندانیکرنێ و غەرامەکرنا دناڤبەرا ئێک هەتا سێ ملیۆن دیناران، یان ژی هەردو سزا.

ئەڤ پێشنیازەیاسایە ژ ئالییێ پەرلەمانی ڤە هاتییە بەرهەڤکرن کو نوکە د ناڤ لیژنەیا ساخلەمییێ دایە و ژ 21 ماددەیان پێکدهێت.