پەیمان خەواجە

 ژ ڕەهەندێن دیرۆکی بۆ هەڤپشکییا پاشەڕۆژێ و ب ئامادەبوونا بەرێز (د. ئالان حەمە سەعید) وەزیرێ پەروەردەیێ ، ل هەولێرا پایتەخت ب فەرمی مەراسیمێن  ب نێڤدەولەتیکرنا کۆمەڵگەها پەروەردەیی یا فەرەنسی (دانیال میتران) ژ لایێ  وەزارەتا پەروەردەیێ هاتە ئەنجامدان .  ئەڤ پێنگاڤە بتنێ  گوهۆڕینەکا  کارگێری یان پەروەردەیی نینە، بەلکو نویکرن و درێژەپێدانا وێ پرا دیرۆکی یە ، ئەوا  گەلێ کورد ب کۆمارا فرەنسا ڤە گرێددەت. ناڤێ "دانیال میتران" ل سەر ڤێ کۆمەڵگەهێ، ڕەنگڤەدانا وەفادارییا کوردانە بۆ دۆستەکا دێرین، و د هەمان دەم دا دەرازینکەکە بۆ خواندنا لاپەرێن دۆستایەتییا سیاسی و مرۆڤایەتی د ناڤبەرا هەردو گەلان دا.

  پەیوەندییێن فرەنسا و کوردان ، بەرهەمێ قویناغەکا نوی نینە ،بەلکو دوستایەتییەکە رەھـ وریشالێن وێ بۆ دەمەکێ درێژ ڤەدگەریت، فرەنسا وەکی ماکا رۆشنگەری ومافێن مرۆڤی ل ئەورۆپا، د چەندین قویناغێن جودا یێن دیروکی دا پێشوازی ل رەوشەنبیر وخەباتکەر و سیاسەتمەدارێن کورد کرییە، پاریس باوەشەک بوو بۆ دەربرینا دەنگێ مەزلومیا گەلێ کورد وناساندنا دۆزا وێ یا ڕەوا  بۆ جیهانێ، فرەنسا رۆلەکێ گرنگ هەبوو د پشتەڤانیکرنا پێشمەرگەی دا ل شەڕێ دژی داعش و سەرۆکێ وی دەمی یێ فرەنسا (فرانسوا ئۆلاند) د وێ ڕەوشێ دا سەرەدانا هەرێما کوردستانێ کر و ل گەل سەرۆک مەسعوود بارزانی سەرەدانا بەرۆکێن شەڕی کر وهەر وەسا ل سەر دەمێ سەرۆکێ نها یێ فرەنسا (ئیمانوێل ماکرۆن) بۆ دوپاتیکرنا پشتەڤانییا فرەنسا بۆ هەرێما کوردستانێ د کاودانێن دژوارێن هەرێم تێدا دەربازبووی، سەرەدانا هەرێما کوردستانێ کر. پێشوازیکرنا فەرمی یا فرەنسا ل سەرۆک بارزانی و ڤەکرنا رێرەوەکێ ب ناڤێ پێشمەرگەی رێزگرتن و پەیوەندییێن موکم  یێن فرەنسا بۆمللەتێ کورد و بۆ پێشمەرگەی وەک بەرەڤانیکەر ژ جیهانا ئازاد نیشان ددەت  .

خالا وەرچەرخانێ یا دیرۆکا نویی یا ڤێ دۆستایەتییێ ، ل چەرخێ بووری ل سەردەمێ سەرۆکاتییا سەرۆکێ وەغەرکری (فرانسوا میتران ) بوو ، میتران خودانێ دیتنەکا  مرۆڤی و ستراتیژی، ئەوی دۆزا گەلێ کورد ، دانا ناڤ جەرگێ سیاسەتا دەرڤە یا فەرەنسا دا . پشتی کارەساتا ئەنفال و کیمیابارانا هەڵەبجە، د دژوارترین قویناغێن گەلێ کورد تێدا دەربازبووی ب کۆچا ملیۆنییا  سالا 1991ێ ، فرانسوا میتران ڕۆلەکێ پێشەنگ گێڕا و ئەو ئەندازیارێ سەرەکی بوو ل پشت دەرچوونا بڕیارا 688 یا جڤاتا ئاساییشا نێڤدەولەتی، بۆ دروستکرنا دەڤەرا ( دژە-فڕین )ێ  بۆ  هەرێما کوردستانێ، ئەڤ بریارە بوو هێڤێنێ سەرەکی یێ  پاراستنا قەوارێ هەرێما کوردستانێ. فرانسوا میتران دۆزا گەلێ کورد ژ پرسەکا ناڤخۆیی بۆ پرسەکا مرۆڤایەتی و سیاسی یا نێڤدەولەتی گوهۆڕی .

دایکا کوردان ( دانیال میتران )  

هەڤدەم ل گەل  دیپلۆماسییا فەرمی یا پاریس، خودانا بلندترین پێگەھــ د دلێ کوردان دا و رویێ مرۆڤی یێ فرەنسا (دانیال میتران) ، هەڤژینا  فرانسوا میتران بوو. (دانیال)ێ ، بتنێ ل پشت پەنجەرێن کوچکا  ئیلیزێ  وەک خانما ئێکێ یا فەرەنسا تەماشەی رویدانان نەدکر، بەلکو وەک شورەشگێرەکا مافێن مرۆڤی هاتە د ناڤ ئێش و ئازارێن مللەتێ کورد دا ، ئەوێ  د ناڤ  ئاوارەیان ل سەر سنووران، رۆندکێن زارۆکێن کورد پاقژکرن و دەنگێ کچ و دایکێن ئەنفالکری گەهاندە  بلندترین سەکۆیێن نێڤدەولەتی. ژبەر ڤێ هەلویستێ وێ، کوردان ناسناڤێ  (دایکا کوردان) پێشکێشی وێ کر .

دەما ئەڤرۆ،  وەزارەتا پەروەردێ  ل هەولێرێ کۆمەڵگەها پەروەردەیی یا فەرەنسی ب ناڤێ (دانیال میتران) ب نێڤدەولەتی دکەت، نامەیەکا فرەرەهەند و کویر ئاراستەی جیهانێ دکەت. ئەڤ پێنگاڤە بەرهەمێ وەفادارییا نەگوهۆر یا گەلێ کوردە بۆ دۆستێن رۆژێن تەنگاڤیا وەک (دانیال و فرانسوا میتران)ی، د هەمان دەم دا، بەڵگەیەکە ل سەر بەردەوامییا دۆستایەتییا ستراتیژی یا د ناڤبەرا هەرێمێ و  پاریس دا کو ژ بوارێ سەربازی و سیاسی بۆ لهەڤگهورینا چاند و پەروەردەیی، ئەڤ ب نێڤدەولەتیکرنە دەرازینکەکا نوی یا زانستی ب ستانداردێن بلند یێن ئەورۆپی بۆ نفشێ نوی  یێ کوردان ڤەدکەت، دا کو ببیتە پرەک بۆ پاشەڕۆژا پەیوەندییێن هەردو ئالیان .

مەراسیمێن وەزارەتا پەروەردێ ل هەولێرێ، بتنێ دەستپێکەکا نوی نینە بۆ ناڤەندەکا خواندنێ، بەلکو سەلماندنا وێ ڕاستییێ یە کو تۆڤێ دۆستایەتییێ یێ ( فرانسوا میتران ) و (دانیال میتران ) ل چەرخێ بووری  ل کوردستانێ چاندی، ئەڤرۆ بوویە دارەکا  بەرهەمدار و دێ فرەنسا دۆستێ دێرین و هەردەمییێ کوردان مینیت، و(دانیال میتران)ژی، دێ ل ناڤ پۆلێن خواندنێ ل هەولێرێ ب نەمر مینیت ، دەما نفشەکێ  نوی یێ کوردان ب ئاستەکێ نێڤدەولەتی بەرەف پاشەڕۆژەکا گەشتر پێنگاڤان د هاڤێژیت.