گاڤ

کەتیبەیێن حزبوللایا ئیراقێ راگەهاند، دێ چەکی بتنێ رادەستی ئیمام مەهدی کەن و ئەو گرۆپێن رێیا رادەستکرنا چەکی گرتیەبەر، پشکەک نەبووینە ژ موقاوەمەیا ئیسلامی و"چەندین سالە وان ئێک بەر ژی نەهاڤێتیە ئەمریکا".

ئەڤ هەلویستێ کەتیبەیێن حزبوللایا ئیراقێ د هەمان رۆژ دا بوو کو گرۆپێ "سەرایا سەلام" یا سەر ب رەوتێ نیشتیمانی یێ شیعی ئێکەم گاڤ هاڤێت بۆ ڤەقەتاندنا پەیوەندییا دناڤبەرا وی گرۆپی و رەوتی دا کو موقتەدا سەدر سەرکرداتییا وێ دکەت، ئەڤە ژی ب رێیا رادەستکرنا بەرپرسیارەتییا ئەمنی یا وان دەڤەرێن قەزایا سامەرا بۆ سوپایی، کو پێشتر د دەستێ سەرایا سەلام دا بوون.

ئەڤ هەلویستێن کەتیبەیێن حزبوللایا ئیراقێ د راگەهاندنەکێ دا هاتن کو رۆژا پێنجشەمبییێ 4ێ گولانا 2026ێ، ژ ئالییێ ئەبو موجاهد عەساف، بەرپرسێ ئەمنی یێ وی گرۆپێ چەکدار ڤە هاتیەبەلاڤکرن.

ئەبو موجاهید عەساف هوشداری دایە کەسێن پەیوەندیدار و راگەهاندنکاران کو نەکەڤنە داڤا ئەمریکا دا، کو ب گۆتنا وی، بزاڤا دروستکرنا ئالۆزییان دکەن و داخواز دکەت کو هشیار بن و ب بەرپرسیارەتی ڤە سەرەدەرییێ بکەن دا کو ڤێ دەلیڤەیێ ژ دەستێ ئەمریکا بئیننە دەر.

د راگەهاندنێ دا هاتیە، رادەستکرنا چەکی و دوبارەرێکخستنا هێزان پرسەکا تایبەتە ب گرۆپەکی یان چەند گرۆپێن دیارکری، ب مەرجەکی ئەڤ رادەستکرنە ب شێوەیەکێ دویماهییێ بیت، نەک هەر-دو مەهان جارەکێ بهێتە دوبارەکرن وەک شاهییەکا دەمکی، دبیت ژی هندەک کەسان خواستەکا رەوا هەبیت دناڤ دەستەیا حەشدا شەعبی دا ب رێیا تێکهەلکرنا هێزێن خۆ دناڤ دەستەیێ دا.

بەرپرسێ ئەمنی یێ کەتیبەیێن حزبوللایا ئیراقێ دبێژیت: "ئەوێن بەرەڤ دانانا چەکی و رادەستکرنا بارەگایێن خۆ گاڤان دهاڤێژن، دناڤ گرۆپێ موقاوەمەیا ئیسلامی دا نەبووینە و بەرپرسیارەتییا هێرشکرنا ل سەر ئەمریکا نەئێخستیە ستوویێ خۆ و چەندین سالە بەرەک ژی نەهاڤێتیە ئەمریکا، لەورا ئەڤ پرسە نەیا سەیرە و ڤێ بریارێ دویر و نێزیک پەیوەندی ب موقاوەمەیا ئیسلامی ڤە نینە. ل گەل وێ یەکێ ژی ئەم وان ئالییان پالددەین کو لەزێ د پرۆسەیا رادەستکرنێ دا بکەن."

د راگەهاندنێ دا هاتیە، ئەوا پەیوەندی ب پێنج پێکهێنەرێن گرۆپێ موقاوەمەیا ئیسلامی ل گەل کەتیبەیێن کەربەلا ڤە هەبیت، هەلویستێ وان دێ وەک خۆ مینیت و ئەرکێن خۆ بجهئینن هەتا کو داگیرکەر هەبیت و سەرپێچی ل سەر ئاسمانی بهێتە کرن و بریارا سیاسی بهێتە کۆنترۆلکرن، د دویڤدا دا دێ د رێکخستنا چەکێن خۆ دا چارەیەکێ ڤەبینن و دێ چەکێن خۆ رێکئێخەنەڤە، بەلێ "ئەم ئێک فیشەکێ ژی رادەست ناکەین" ئەگەر بۆ ئیمام مەهدی نەبیت، ئەڤە ژی وەک ئاماژەیەک بۆ ئیمامێ دویماهییێ یێ شیعان کو دویکەفتییێن وی باوەر دکەن دێ ڤەگەریتە ڤە.