گاڤ

وەزارەتا کارەبێ یا حکومەتا هەرێما کوردستانێ راگەهاند، یێ پارێ کارەبێ د دەما 50 رۆژان دا نەدەت دێ کارەبا وى هێتە بڕین و قەرێن کەڤن ژى پێدڤییە ل دەمەکێ نێزیک بهێنە دان.

وەزارەتا کارەبێ حکومەتا هەرێما کوردستانێ د راگەهاندنەکێ دا دیارکر، یێ د دەمێ 50 رۆژان دا پارێ پسوولا کارەبێ یێ پڕۆژێ رۆناکى نەدەت، کارەبا وى دێ هێتە بڕین و دياركريە، ئەڤ یەکە دێ هاریکار بیت بۆ بەردەوامییا سێکتەرێ کارەبێ ل هەرێمێ بۆ دەمەکێ درێژ.

هەروەسا ئاشکراکریە، پترییا پشکدارێن کارەبێ د دەمێ خۆ دا پارەیێ خۆ ددەن و داخواز ژ وەلاتییان کر قەرێن بەرى پڕۆژێ رۆناکى ژى بدەن و ل دەمەکێ نێزیک یێ پارێ کەڤن ژى نەدەت دێ کارەبا وى هێتە بڕین.

هەروەسا ئاشکراکر، ئەڤ پرۆسەیە ل گۆرەیى رێنمایێن وەزارەتێ یێن سالا 2019ێ یە و نوکە هەمى پشکدارێن پڕۆژەیێ رۆناهى بجهـ دئینن.

وەزارەتێ دیارکریە، حکومەتا هەرێمێ بەردەوام د بزاڤان دایە بۆ بەرهنگاربوونا سەرپێچییان و هەموو جۆرێن سەختەکارییان و دیارکر، نوکە 80%ێ یا پشکدارێن کارەبێ کێمتر ژ بەرێ پارەیى ددەن.

داخواز ژى ژ هەموو پشکارێن کارەبێ کر خۆ تۆمار بکەن دا د دەمێ خۆ دا بهێنە ئاگەهدار کرن و دیارکر، ئەگەر کارەبا وەلاتییەکى هاتە بڕین ژبەر نەدانا پارەیى و پشکدارى چوو پارە دان د کێمتر ژ 24 دەمژمێران دا کارەبا وى دێ هێت.