گاڤ

بەرپرسێ راگەهاندنا پۆلیسێن پارێزگەها دهۆکێ، راگەهاند کو هێزێن پۆلیسان ب هەماهەنگی ل گەل دەزگەهێن ئاسایشێ، باندەکێ خێزانی دەستەسەرکر کو گەف ل کچەکێ دکرن و ب رێیا گەفان پارە ژێ وەردگرتن.

چارشەمبییێ 15ێ تیرمەها 2026ێ، هێمن سلێمان، بەرپرسێ راگەهاندنا پۆلیسێن پارێزگەها دهۆکێ  راگەهاند، "بەری دو رۆژان کەیسەک هاتیە سپاردن بۆ بنگەهێ پۆلیسێن مالتایێ ل دهۆکێ. د ڤەکۆلینان دا دەرکەفت کو کچەکا 21 سالی ژ ئالییێ گەنجەکیڤە هاتیە سەردابرن و ب رێیا وەرگرتنا ڤیدیۆ و وێنەیێن وێ بێستارە، گەف لێ هاتینە کرن. وی تۆمەتباری د دەمێن جودا-جودا دا زێدەتر ژ 8 هزار دۆلارێن ئەمریکی (پتر ژ 80 وەرەقان) ژ وێ کچێ وەرگرتبوون."

بەرپرسێ راگەهاندنێ دیارکر ژی کو "ئەو تۆمەتبارە خەلکێ پارێزگەها مووسلێ یە و ئەڤ تاوانە ب هەڤکارییا باب، خال و دایکا خۆ کربوو، کو چەندین جاران هاتیبوونە پارێزگەها دهۆکێ دا کو ل ژێر گەفان پارەیی ژ وێ کچێ وەربگرن."

هێمن سلێمانی هەروەسان دازانین، "پۆلیسێن بنگەهێ مالتا ب هەماهەنگی ل گەل هێزێن ئاسایشا زالگەهێن پارێزگەها دهۆکێ، شیان د هەیاما دو رۆژان دا ڤی تۆمەتباری دەستەسەر بکەن. نوکە ل دویڤ ماددەیێ (452) ژ یاسایا سزادانا ئیراقی هاتینە راگرتن و ڤەکۆلین ل گەل وان بەردەوامە."

بەرپرسێ راگەهاندنێ دیسان ئاماژە ب هندێ کر کو ئەگەرێ بەردەوامبوونا کرنا ڤێ تاوانێ ئەوبوو کو کچ ژ ترسا ئاشکرابوونێ نەوێریابوو خێزان یان پۆلیسان ئاگەهدار بکەت.

ناڤبری داخوازی ژ کچ، ژن و هەمی وەلاتییان کر کو د دەمێ تووشبوونا هەر کێشەیەکا ب ڤی رەنگی، ب زویترین دەم پۆلیسێن دهۆکێ ئاگەهدار بکەن داکو رێگری ل تاوانباران بهێتە کرن.