گاڤ

چەکدارێن حووسی یێن یەمەنێ راگەهاند، وان سازییەکا پەترۆلێ یا سەر ب کۆمپانییا ئارامکۆ ڤە ل سەر کنارێن رۆژئاڤایێ سعوودییێ ل سەر دەریایا سۆر کریە ئامانج.

یەحیا سەریع، پەیڤدارێ سەربازی یێ حووسییان راگەهاند؛"هێزێن وان شیاینە ب درۆنان پالاوگەها ئارامکۆ ل جازان بکەنە ئارمانج و لێدانا ئارمانجی ژی گەلەک یا هویربوویە."

ئاماژە ب وێ یەکێ ژی کر کو ئه ڤ هێڕشە ل بەرسڤا بەزاندنا ئاسمانێ هەردو پارێزگەهێن سەعدە و حەججە ل باکورێ رۆژئاڤایێ یەمەنێ ژ ئالییێ درۆنێن سعودییێ ڤە هاتیەکرن.

ئەڤە ل دەمەکێ دایە هەر ئەڤرۆ وەزارەتا وزەیا سعودییێ راگەهاند؛ وان شیایە ئاگرەکێ ل ئێک ژ سازییێن پالاوگەها ئارامکۆ ل باژێرێ جازان ڤەمرینن، بێی کو هیچ ئەرگەرەکێ ژ بۆ پەیدابوونا وی ئاگری دیاربکەن.