گاڤ

ئەندامەکێ لیژنەیا نەفت و گازێ ل پەرلەمانێ ئیراقێ ئاشکراکر، نڤیسارەکا فەرمی ب پشتەڤانییا ئیمزایێن پتر ژ 166 پەرلەمانتاران ئاراستەیی سەرۆکوەزیر عەلی زەیدی کریە، ب مەبەستا دیتنا چارەیەکا بلەز بۆ ئاریشەیا پانزینێ ل هەرێما کوردستانێ.

سێشەمبییێ 11ێ تەباخا 2026ێ، سیپان شێروانی، ئەندامێ لیژنەیا نەفت و گازێ ل پەرلەمانێ ئیراقێ راگەهاند، ب مەبەستا دیتنا چارەیەکا گونجایی بۆ کێشەیا سۆتەمەنییێ و ب تایبەتی پانزینێ ل هەرێما کوردستانێ، سەرکەفتیبوون د کۆمکرنا ئیمزایێن پتر ژ 166 ئەندامێن پەرلەمانی دا، کو دبیتە زۆرینەیا رەها یا پەرلەمانی.

شێروانی ئاماژە ب وێ یەکێ کر، ب رێیا نڤیسارەکا فەرمی بۆ سەرۆکوەزیرێ ئیراقێ، مە داخوازکریە دەستێوەردانەکا بلەز بهێتە کرن و رێکارێن پێدڤی بهێنە وەرگرتن بۆ ب دویماهیئینانا کێشەیا پانزینێ ل پارێزگەهێن هەرێما کوردستانێ.

وی ئەندامێ لیژنەیا نەفت و گازێ رۆهنکرنەک دا، د نڤیسارێ دا ب شێوەیەکێ یاسایی داخوازکریە، پشکا هەرێما کوردستانێ ژ پانزینا پالاوتی یان پەترۆلا خاڤ بهێتە دابینکرن. ئەڤە ژی ل سەر بنەمایێ دەقێن دەستووری و ل گۆرەیی رێژەیا ئاکنجییێن هەرێمێیە، بۆ دەستەبەرکرنا دادپەروەرییێ د دابەشکرنا ژێدەران دا.

شێروانی دوپاتکر، کو داخوازکارە سەرۆکوەزیر ل دویڤ داخوازییا پەرلەمانی و جەماوەری بهێت (بەرسڤا وان بدەت)، ب مەبەستا دابینکرنا پێدڤییێن وان یێن سەرەکی د کەرتێ وزەیێ دا.