گاڤ

میدیایا تورکیا پلانا چەکدانانا پارتییا کرێکارێن کوردستانێ (پەکەکە) ب شێوەیێ 10 گاڤان بەلاڤکر.

پشتی کو رۆژا دووشەمبیێ 10-8-2026 پرۆژەقانوونا تایبەت ب پرۆسەیا چارەسەرییێڤە کو ژ 12 خالان پێکدهێت، ل پەرلەمانێ تورکیا هاتییە پەسەندکرن، ئەڤرۆ سێشەمبییێ میدیایا وی وەلاتی گاڤێن چەکدانانا پەکەکێ ب شێوەیێ 10 خالان بەلاڤکرن.

ژ سەرجەمێ 592 پەرلەمانتاران، 563 پەرلەمانتاران پشکداری د دەنگدانا پرۆژەقانوونا تایبەت ب پرۆسەیا چارەسەرییێ دا کر؛ ژ وان پەرلەمانتاران ژی 467ان دەنگێ بەلێ و 87ان دەنگێ نەخێر دان. هەروەسا حەفت پەرلەمانتار بێلایەن بوون.

ئێکسەر پشتی دەنگدانێ، سەرۆکاتییا پەرلەمانێ تورکیا راگەهاند کو ئەو پرۆژەقانوونە ژ وی دەمی ڤە بوویە قانوون. ئەڤێ چەندێ وەکر چەوانییا بجهئینانا قانوونێ و ب تایبەتی ژی شێوازێ چەکدانانا پەکەکێ ببیتە رۆژەڤ.

میدیایا تورکیا ئەڤرۆ سێشەمبییێ 11ێ تەباخا 2026ێ، شێوازێ چەکدانانێ ب شێوەیێ 10 گاڤان بەلاڤکر کو ب ڤی رەنگی یە:

1-  هەمی چەک، تەقەمەنی، درۆن، پارامۆتۆر (پەرەشووتێن پێشکەفتی)، بێتەلێن هەیڤا دەستکرد (ستەلایت) و هەمی کەلوپەلێن سەر ب رێکخراوێ ڤە دێ هێنە رادەستکرن.

2- پشتی چەکدانانێ، دەزگەهێ هەوالگرییا نیشتیمانی یا تورکیا (میت) دێ دویڤچوونا مەیدانی کەت و بابەتی پشتراست کەت.

3- ل ژێر رۆناهییا گۆتنێن وان ئەندامێن پەکەکێ یێن کو خۆ رادەست دکەن، جهێن کۆگەهێن چەکی دێ هێنە دەستنیشانکرن.

4- ئەو چەکێن کو جهێن وان دهێنە دیارکرن، دێ هێنە رادەستکرن.

5- سەرجەمێ وان چەک، تەقەمەنی و بۆمبەیێن دەستبسەردا دهێتەگرتن، ژ ئالییێ دەولەتێڤە دێ هێنە تۆمارکرن.

6- ئەرکێ وەرگرتنا چەکێن ل دەرڤەیی وەلاتی دێ د ستوویێ هێزێن چەکدار یێن تورکیا دا بیت، ل ناڤخۆییا وەلاتی ژی دێ ل ژێر دەستهەلاتا دەزگەهێن پۆلیس و جەندرمەیان دا بیت.

7- ئەندامێن پەکەکێ ل دەرڤەیی تورکیا، دشێن ب رێیا نوینەراتییێن دیپلۆماسی یێن وەلاتی، ب شێوەیێ کەسی یان ب رێیا پارێزەریڤە داخوازییا خۆرادەستکرنێ پێشکێش بکەن.

8- ئەو ئەندامێن پەکەکێ یێن خۆ رادەست نەکری، دشێن ب تنێ، یان ژی ب کۆم ل باژێران خۆ رادەست بکەن.

9- پشتی پشتراستکرنا رادەستکرنا چەکان و هەلوەشاندنا تەمام یا پەکەکێ ژ ئالییێ جڤاتا ئاسایشا نیشتیمانی یا تورکیاڤە، دێ بریار ل سەر ڤێ چەندێ هێتەدان.

10- ب بەلاڤکرنا راگەهاندنا هەلوەشاندنا پەکەکێ د رۆژنامەیا فەرمی دا، میکانزمێن دی دێ کەڤنە د بیاڤێ بجهئینانێ دا.