گاڤ

بەرپرسەکا بلند یا وەزارەتا سامانێن سروشتی یا حکومەتا هەرێما کوردستانێ ئاشکراکر، ل سەر بزاڤێن خۆ د بەردەوامن بۆ چارەکرنا کێشەیێن پانزینێ. گۆت ژی: هەرێما کوردستانێ دشێت پانزینێ ب بهایێ (450) دیناران دابەش بکەت، ب وی مەرجی کو بەغدا تێچوویێ بەرهەمئینان و ڤەگوهاستنا وێ پەترۆلێ دابین بکەت یا کو بۆ بکارئینانا ناڤخۆییا هەرێمێ هاتییە تەرخانکرن.

سێشەمبییێ 11ێ تەباخا 2026ێ، د. خەزال هۆستانی، رێڤەبەرا گشتی یا کاروبارێن ئابۆری و گرێبەستان ل وەزارەتا سامانێن سروشتی راگەهاند: "قەیرانا سۆتەمەنییێ، ب تایبەتی پانزینێ، قەیرانەکا گشتگیرە و ل هەمی جیهانێ نەجهگیری د بهایێ سۆتەمەنییێ دا هەیە.

نوکە کو بهایێ سۆتەمەنییێ، ب تایبەتی پانزین، ل هەرێما کوردستانێ بلندبوویە، ئەم وەک وەزارەتا سامانێن سروشتی بەردەوام بزاڤان دکەین ڤێ بارگرانییێ ل سەر ملێن وەلاتییان سڤکتر بکەین، بۆ ڤێ مەبەستێ ژی مە چەندین گاڤ و رێکار گرتینەبەر."

گۆت ژی: "بۆ بەردەستکرنا بڕەکێ پتر یێ پانزینێ ل بازارێن هەرێمێ، پشتەڤانییا کۆمپانییان دهێتە کرن و ئاسانکارییا تەمام بۆ وان دهێتە کرن، دا کو پانزینا ب کوالێتییا ستاندارد بۆ هەرێما کوردستانێ بهێتە هاوردەکرن."

د. خەزال هۆستانی رۆهنکرن دا، پارزنینگەهێن ئیراقێ نەشێن پێدڤییێن ناڤخۆیی یێن پانزینێ دابین بکەن؛ ژبەر هندێ حکومەتا ئیراقێ بودجەیەکا تایبەت بۆ هاوردەکرنا پانزینێ تەرخان کریە و ئێخستییە بەر دەستێ وەزارەتا پەترۆلێ، کو ب رێکا کۆمپانیا "ئادنۆک" یا ئیماراتی و چەند وەلاتێن دی پانزینێ هاوردە دکەت. بهایێ هەر لیترەکا ڤێ پانزینا هاوردەکری پتر ژ (2,500) دینارانە، کو خەرجییا وێ د ستوویێ حکومەتا فیدرال دایە، لێ ب (450) دیناران ددەتە وەلاتییان و پتر ژ (2,000) دیناران بۆ هەر لیترەکێ پشتەڤانییا دارایی دهێتە کرن. لێ ژ ڤی قەبارەیێ پانزینا هاوردەکری، چو بڕ بۆ حکومەتا هەرێمێ نەهاتییە تەرخانکرن و مە ژی داخواز کریە بڕەک ژ پانزینا هاوردەکری بۆ هەرێما کوردستانێ بهێتە تەرخانکرن، یان ژی بودجەیەک بۆ هاوردەکرنا پانزینێ بۆ هەرێما کوردستانێ بهێتە دیارکرن.

وێ بەرپرسێ هەروەسا ئاشکرا کر، ب فەرمی داخواز ژ وەزارەتا پەترۆلێ یا فیدرال کریە پشکا پەترۆلا کوردستانێ بۆ بکارئینانا ناڤخۆیی، ژ (50) هزار بەرمیلان رۆژانە بهێتە زێدەکرن بۆ دناڤبەرا (130) هەتا (140) هزار بەرمیلێن رۆژانە دا، ئەڤ زێدەکرنە ژ بەرهەمێ کێلگەهێن هەرێمێ بیت یان کێلگەهێن ئیراقێ. لێ بەغدا هەتا نوکە بەرسڤا ڤێ داخوازییا وان نەدایە و بێدەنگە.

د. خەزال هۆستانییێ گۆت ژی: "بەری دروستبوونا ڤێ قەیرانێ، مە چەندین نڤیسار بۆ بەغدا هنارتبوون و مە پێشبینییا ڤێ رەوشێ کربوو؛ مە داخواز ژ وان کربوو هاریکارێن مە بن دا کو ئەم نەگەهینە ڤێ رەوشا نوکە، لێ بەغدا بێ-بەرسڤ بوو."

دەربارەیی بنەمایێ بهایێ (450) دیناران، د. خەزال هۆستانییێ رۆنکرن دا، تێچوویێ بەرهەمئینان و ڤەگوهاستنا پەترۆلێ ل نوکە بۆ هەر بەرمیلەکێ ب (16) دۆلاران هاتییە دیارکرن بۆ وی بڕێ پەترۆلێ یێ کو بۆ بکارئینانا ناڤخۆییا هەرێمێ دهێتە تەرخانکرن، کو خەرجییا وێ د ستوویێ حکومەتا هەرێمێ دایە.

دبێژیت ژی: ئەگەر ئیراق وێ خەرجییا (16) دۆلاری یا بەرهەمئینان و ڤەگوهاستنێ ب ستوویێ خۆڤەبگریت و تێچوویێ وێ بدەتە حکومەتا هەرێمێ، ل وی دەمی وەزارەتا سامانێن سروشتی دشێت ل شوینا (750) دیناران، پانزینا حکۆمی ب (450) دیناران بۆ هەر لیترەکێ بدەتە وەلاتییان.

د. خەزال هۆستانی دەنگۆیێن هناردەکرنا پانزینا بەرهەمهاتی یا وەزارەتا مە ل هەردو پارزنینگەهێن (کار) و (لاناز) بۆ دەرڤەیی وەلاتی رەتکرن و گۆت: "ئەڤە ئاخڤتنەکا نەراستە و بۆ شاشکرنا خەلکییە." گۆت ژی: "ژ (50) هزار بەرمیلێن پەترۆلێ، ئێک ملیۆن و (750) هزار لیترێن پانزینێ بەرهەم دهێن، هەمی تانکەرێن ڤەگوهاستنا پانزینێ ژ ئالییێ تیمێ چاڤدێری و پشکنینێڤە، ل دەما دەرکەفتنا وان ژ پارزنینگەهان هەتا ڤالاکرنا وان ل پانزینخانەیان، ئێک ب ئێک چاڤدێرییا وان دهێتە کرن و ب سیستەمێ کامیرەیێن چاڤدێرییێڤە هاتینە گرێدان.

هەروەسا بەحس ل وێ چەندێ ژی کر، لیژنەیا تایبەتمەند بەردەوام چاڤدێرییا ئاستێ کوالێتی و بهایێ وان پانزینخانەیان دکەت یێن کو ل گۆرەیی لیسا دیارکری رۆژانە پانزینێ ب بهایێ (750) دیناران ل وەزارەتا مە دفرۆشن.