گاڤ

یانەیا کوردان ئامەدسپۆرد ئێکەم یارییا خۆدا د خۆلا سۆپەرلیگ یا تورکیا دا ب سەرکەفت و راستەوخۆ سەرێ رێزبەندییا خۆلێ گرت.

یانەیا ئامەدسپۆر کو ل خۆلا سۆپەرلیگ یا تورکیا بتنێ نوێنەرا ئامەدا باکورێ کوردستانێیە، شڤێدی د ئێکەم یارییا خۆ دا مێهڤاندارییا یانەیا ئەرزەرۆم سپۆر کر و ب ئەنجامێ 3-0 سەرکەفتن ل سەر تۆمارکر.

یاریێن گەرا ئێکێ ژ خۆلا سۆپەرلیگ یا ژ بلی یارییا د ناڤبەرا سامسۆنسپۆر و گۆزتەپە هەمی هاتینە کرن و ل گۆرەی خشتەیێ رێزبەندییێ ئامەدسپۆر پلەیا ئێکێ گرتییە، ل دەمەکی هەردو یانەیێن ب هێزێن خۆلا سۆپەرلیگ یا تورکیا گالاتاسارای و فەنەرباخچە ل پلەیێن شەشێ و چاردێ دهێن.

یانەیا کوردی ئامەدسپۆر ژ بەر کو سێ گۆل تۆمارکرنینە کو ل یاریێن ڤێ حەفتییێ دا تا نوکە هیچ یانەیەکێ سێ گۆل تۆمارنەکرینە، پلەیا ئێکێ گرت.

بریارە یانەیا ئامەدسپۆر ل حەفتیا دوێ ژ ڤی وەرزێ سۆپەرلیگێ، رۆژا 24-8-2026ێ ببیتە مێهڤانا یانەیا کۆجائەلی سپۆر.