گاڤ

دۆناڵد ترەمپ، سەرۆکێ ئەمریکا راگەهاند کو شەڕێ نوکە ل گەل ئیرانێ بۆ وەلاتێ وی "تشته‌كێ بچویکە" و رەتکر کو وەکی شەڕەکێ مەزن پێناسە بکەت.

دۆناڵد ترەمپ ل نڤیسینگەها هێکەیی ل کۆشکا سپی، بەرەڤانی ژ جەی دی ڤانس یێ جێگرێ خۆ کر کو رۆژەکێ بەری هینگێ شەڕێ ئیرانێ وەکی "شەڕ" وەسف نەکربوو. ترەمپی گۆتە رۆژنامەڤانان: "ئەز دبێژمە ڤێ هەڤرکییا لەشکەری، چونکی بۆ مە تشته‌كێ گەلەک بچویکە و تشته‌كێ مەزن نینە. ل ڤەنزوێلا مە چ کەس ژدەستنەدان، ل ئیرانێ مە 18 کەس ژدەستداینە، د دەمەکی دا ل ڤێتنامێ 100 هزار کەس و د شەڕێن دی دا ب دەهان هزار کەس هاتبوونە کوشتن."

سەرۆکێ ئەمریکا گۆت ژی: ئارمانجێن وان یێن ستراتیژی د ڤی شەڕی دا، کو هەتا نوکە 37.5 ملیار دۆلار ل گەنجینەیا ئەمریکا خەرجکرینە، بجهـهاتینە. ترەمپی گۆت: "د هەیاما پێنج مەهان دا، مە رێگری لێ کر ببنە خودانێن چەکێ ئەتۆمی. ئەگەر ئەم نەچووباینە وێرێ، نوکە نە ئسرائیل دا مینیت و نە رۆژهەلاتا ناڤین؛ رەنگە وان هێرشکربایە سەر باژێرێن ئەورۆپا و باژێرێن مە ژی."

ترەمپی ئاماژە ب وێ یەکێ ژی کر، نوکە هێزێن ئەمریکا "گەلەک ب توندی" کۆنترۆلا دەتەنگا هورمز کریە و گۆت: "مە رادارێن وان تێکشکاندن، فرۆکەیێن وان و ئەو تشتێن بۆ پاراستنا دەربەندێ بکاردئینان ژی مە لێدان. شەڤا بۆری مە چەندین بەلەم گرتن و کەشتی رۆژانە ب پاراستی و سلامەتی دەرباز دبن."