گاڤ

زاخۆ دێ ئێکەم یارییا خۆ ل ژێر سەرپەرشتییا تەلال بلووشی برێڤەبەت؛ راهێنەرێ قەتەری دبێژیت: پێدڤییە ئەم هشیار بین.

شەمبییێ 5ێ ئیلۆنا 2026ێ، د گەڕا پێنجێ یا خۆلا ستێرێن ئیراقێ دا، ل دەمژمێر 6:45 خۆلەکی ئێڤاری، یانەیا زاخۆ د یاریگەها خۆ دا دێ رویبروی یانەیا تەلەبە بیت.

پشتی دویرخستنا لۆران بانیدی یێ فڕەنسی ژ پۆستێ ڕاهێنەراتییێ، ئەڤرۆ زاخۆ دێ ئێکەم یارییا خۆ ل ژێر سەرپەرشتییا تەلال بلووشی راهێنەرێ نوی یێ تیمێ برێڤەبەت.

تەلال بلووشی، راهێنەرێ زاخۆ دەربارەیی بەرهەڤییێن وان بۆ ڤێ یارییێ گۆت: "تەلەبە یانەیەکا باشە و راهێنەرێ وان ژی دشێت د هەر دەمەکێ دا بیت ئاستەکێ باش پێشکێش بکەت، لەوما پێدڤییە ئەم ب هشیاری ڤە مامەلەیێ ل گەل رەوشا یارییێ بکەین.

هەر چەندە دەمەکێ کێمە من ئەڤ ئەرکە وەرگرتیە لێ ئەم بۆ یارییێ د بەرهەڤین، سەرباری کو پشکەک ژ یاریزانان ژبەر هنگافتنێ یان کارتا سۆر دێ ژ یارییێ بێبەهر بن."

زاخۆ د چار یارییێن بۆری دا خودانا سەرکەفتنەکێ، وەکهەڤییەک و دو شکەستنانە و ب چار خالان د رێزبەندییا 17ـێ یا خۆلێ یە، ل گەڕا بهێت ژی ل دەرڤەیی یاریگەها خۆ دێ بەرانبەر یانەیا جۆلان یارییێ کەت. ل لایێ دی، تەلەبە خودانا 2 خالانە و ل رێزبەندییا 19ـێ یا خۆلا ستێرێن ئیراقێیە.