گاڤ

سەرۆکێ هەڤپەیمانییا هێزێن دەولەتا نشتیمانی راگەهاند، ئێمناهی و سەقامگیرییا هەرێما کوردستانێ پشکەکا نەڤەقەتیایە ژ ئێمناهی و سەقامگیرییا ئیراقێ و دوپاتکر، هێزێن هەڤپەیمان ل سەرێ هەیڤێ دێ ژ ئیراقێ دەرکەڤن.

عەمار حەکیم، سەرۆکێ هەڤپەیمانییا هێزێن دەولەتا نشتیمانی د کۆنگرەیەکێ رۆژنامەڤانى دا ل پارێزگەها دهۆکێ گۆت: ئەو پێخۆشحالبوومئەڤرۆ سەرا دهۆکێ دایى، و گۆت: ئێمناهی و سەقامگیرییا هەرێما کوردستانێ پشکەکا نەڤەقەتیایە ژ ئێمناهی و سەقامگیرییا ئیراقێ.

هەروەسا ئاشکراکر، ئەو د سەرەدانا خۆ یا ئەڤرۆ دا چوونە زانکۆیێ و ل گەل کەسێن فەرمی و هۆز و کەسایەتییێن جڤاکی یێن ڤێ پارێزگەهێ کۆمببین.
دوپاتکر کو ئارمانجا وان ژ ڤێ سەرەدانێ ئارمانجەکا جڤاکی بوو داکو هایداری رەوشا ڤێ پارێزگەهێ و خەلکێ وێ ببین، و گوهدارییا بۆچوونێن وان هاتەکرن ژبەرکو ئیراق وەلاتێ وانە ژى، هەروەسا دیتنێن وان بۆ پێشهاتێن دەڤەرێ و جیهانی و ڤێ رەوشا ئیراق تێدا دەربازدبیت دیاربوون و دوپاتکر،  سەرەدان و پەیوەندی و لهەڤگوهارتنا هزر و بۆچوونان، کورێن ڤی وەلاتی نێزیکی هەڤدو دکەن.
بەحس ل مالباتا خۆ ژى کر و ئاشکراکر، ئەو ژ مالباتا ئیمام موحسن حەکیمی نە، ئەڤ مالباتە ب پەیوەندییێن باش ل گەل کوردستان و گەلێ کورد یا بەرنیاسە، ژبەر ڤێ یەکێ ئەو دخوازن جار جار ڤان جۆرە سەرەدانان بکەن و ژ نێزیک هایداری رەوشا خەلکێ خۆ و هۆز و کەسایەتییێن رێزدار یێن پارێزگەهێن هەرێما کوردستانێ ببین.

سەرۆکێ هەڤپەیمانییا هێزێن دەولەتا نشتیمانی زێدەتر دبێژیت: بێگۆمان بدویماهیک هاتنا ئەرکێ هەڤپەیمانییا نێڤدەولەتی یا دژی داعشێ کو دێ ل دویماهییا هەیڤا ئیلۆنێ دەرکەڤن، ئەڤە نامەیەکە کو ئیراق یا باش دبیت و ئیراق شیا ب سەر تیرۆرێ سەربکەڤیت و هاریکارییا هەڤپشكێن خۆ یێن هەرێمی و نێڤدەولەتی ژی بکەت و ب هاریکاریا کورێن خۆ شیان ڤی کاری بکەن، دەمێ تو دبینی ئەرکێ ڤێ هەڤپەیمانییێ بدویماهیک هات، دێ زانی کو ئیراق یا ب سلامەتە و ژ تەحەدییێن ئەمنی دویر کەفتییە و ئەڤە نامەیەکا دلخۆشکەرە.
عەمار حەکیم دازانین ژى بێگۆمان ئێمناهی و سەقامگیرییا هەرێما کوردستانێ پشکەکا نەڤەقەتیایە ژ ئێمناهی و سەقامگیرییا ئیراقێ و بۆ نەهێلانا هەر گەفەکێ ل سەر هەمی ئاخا ئیراقێ و هەرێما کوردستانێ ژی رژدن.

ل دویماهییا کۆنگرەیێ خۆ ژى دیارکر، پێشتر ژی کار هاتییەکرن و دێ بەردەوام ژی کار بۆ پاراستنا ئیراقێ ژ هەر هێرشەکێ ژ هەر ئالییەکێ کەن.