گاڤ

حکومەتا هەرێما کوردستانێ دبێژیت: شاندەکێ بلند یێ حکومەتا هەرێما کوردستانێ ب مەبەستا دانوستاندنێ ل سەر پرۆژەیاسایا بودجەیا 2027 و جهگیرکرنا شایستەیێن دارایی گەهشتە باژێرێ بەغدا.

سێشەمبییێ 8ێ ئیلۆنا 2026ێ، حکومەتا هەرێما کوردستانێ د راگەهاندنەکێ دا بەلاڤکر، شاند ژ وەزیرێن دارایی و ئابۆری، سامانێن سروشتی، سەرۆکێ دیوانا جڤاتا وەزیران، سکرتێرێ جڤاتا وەزیران، سەرۆکێ فەرمانگەها هەماهەنگی و دویڤچوونێ و بریکارێ وەزارەتا پلاندانانێ پێکهاتییە.

ل گۆرەیی راگەهاندنێ، بریارە شاند زنجیرەیەکا کۆمبوونان ل گەل وەزارەتێن پەیوەندیدار یێن حکومەتا فیدرال بکەت، کو دەستپێکێ دێ ل گەل وەزارەتا دارایی بیت و پاشی ژی ل گەل وەزارەتێن پلاندانان و پەترۆلێ بیت.

سەرەدانا ڤی شاندی د دەمەکی دایە، هەرێما کوردستانێ د دویماهییا مەها تەباخا بۆری دا، پرۆژەیێ پشکا بودجەیا سالا 2027 رەوانەیی بەغدا کربوو.

د راگەهاندنێ دا هاتییە: "ئارمانجا سەرەکی یا سەرەدانا شاندێ هەرێما کوردستانێ پشکداریکرنا راستەقینە یا حکومەتێ یە د بەرهەڤکرنا رەشنڤیسێ پرۆژەیاسایا بودجەیا گشتی یا فیدرال بۆ سالا دارایی یا 2027، ئەو ژی ب مەبەستا جهگیرکرنا پشک و شایستەیێن دەستووری و دارایی یێن هەرێما کوردستانێ دناڤ پرۆژەیاسایێ دا."

حکومەتا هەرێما کوردستانێ دبێژیت: د کۆمبوونان دا شاندێ حکومەتا هەرێمێ دێ دیتن و داخوازییێن هەرێما کوردستانێ دەربارەیی چەندین پرسێن گرنگ نیشاندەت، ژ وان ژی: تەرخانکرنا مووچەیی و شایستەیێن دارایی یێن مووچەخۆران، پلە و میلاکێ وەزیفی، تەرخانکرنا پرۆژەیێن وەبەرهێنانێ و پێشخستنا پارێزگەهان، بودجەیا بکاربرنێ و دۆسەیا پەترۆلێ.

ئەڤە د دەمەکی دایە، ل 20-8-2026، وەزارەتا دارایی و ئابۆری یا هەرێما کوردستانێ، پشتی پتر ژ مەهەکێ ژ دانوستاندنێن چڕ و خەملاندنا تەڤئالی یا داهات و خەرجییان، بدویماهیهاتنا پرۆسەیا بەرهەڤکرنا پشکا هەرێما کوردستانێ بۆ پرۆژەیاسایا بودجەیا فیدرالی یا 2027 راگەهاند و پرۆژە ب هەردو شێوازێن کاغەزی و ئەلکترۆنی رەوانەیی بەغدا کر.

وەزارەتێ راگەهاند: "د ڤی پرۆژەیی دا، هەمی شایستەیێن دارایی، داخوازییێن دەستووری و پێدڤییێن حکومەتا هەرێما کوردستانێ ب هویری هاتینە جهگیرکرن، ژ وان ژی:

● دابینکرنا هەمی مووچەیێ فەرمانبەران، خانەنشینێن شارستانی و سەربازی، کێمئەندامێن سەنگەری، زیندانییێن سیاسی و مالباتێن سەربلند یێن شەهیدان.

● دابینکرنا مووچەیی بۆ خێزانێن کێمداهات و وەکهەڤکرنا مووچەیێ خودان پێدڤییێن تایبەت ل گەل یێن بەغدا. دابینکرنا خەرجییێن دەرمان و پێدڤییێن ساخلەمییێ.

● جهگیرکرنا مافێ پلەبلندکرنا فەرمانبەرێن هەرێما کوردستانێ، کو بۆ چەندین سالان ژ ئەگەرێ قەیرانا دارایی هاتبوو راگرتن.

● وەکهەڤکرنا مووچە و شایستەیێن دارایی یێن پێشمەرگەیی.

● وەکهەڤکرنا مووچەیێ خانەنشینێن هەرێما کوردستانێ ل گەل خانەنشینێن ئیراقێ و وەرگرتنا هەمی شایستەیێن دارایی یێن وان یێن بەرێ."