گاڤ

سەرۆک مەسعوود بارزانی سوپاسنامەیەک ب ناڤێ هەمی ئەندامێن مالباتا بارزانی بەلاڤکر و سوپاسییا هەمی وان کەسان دکەت یێن کو د تازیا خودێ ژێ رازی عەبدولواحد ئیبراهیم شێخ عەبدولسەلام بارزانی دا پشکدار، هەڤسۆز و هەڤخەمێن وان بووین.

د پشکەکا سوپاسنامەیێ دا سەرۆک بارزانی دبێژیت: "هەڤسۆزی و پشکدارییا بەردەوام یا خەلکێ خۆشتڤی یێ کوردستانێ د خەما مەدا، هەردەم جهێ رێزێ یە. هیڤیدارم هەمی ئالی ژ ئازار و نەخۆشییان دویربن و خودایێ مەزن خێرا هەمی ئالییان بنڤیسیت."

سەرۆک بارزانی دبێژیت: "ب ناڤێ خۆ و هەمی ئەندامێن مالباتا بارزانی، گەلەک سوپاسییا وەلاتییێن خۆشتڤی، ئالییێن سیاسی، بەرپرسێن حزبی و حکومی یێن ئیراقێ و هەرێما کوردستانێ، کونسول و نوینەرێن وەلاتان، زانایێن ئایینی، نوینەرێن پێکهاتەیێن نەتەوەیی و ئایینی، سەرۆکهۆز و کەساتییێن جڤاکی، رەوشەنبیری و ئەکادیمی یێن ئیراقێ و هەرێما کوردستانێ، هێزێن هەڤپەیمانان، فەرماندە و هێزێن قەهرەمان یێن پێشمەرگەیی، ئاسایش و پۆلیسان، رێکخراوێن جڤاکا مەدەنی، راگەهاندنێ و هەمی تەخ و چینێن هەرێما کوردستانێ و ئیراقێ و هەمی کوردستانییێن خۆشتڤی ل هەر چار پارچەیێن کوردستانێ دکەم، کو ئەرک کێشا و ل تازیا خودێ ژێ رازی عەبدولواحد ئیبراهیم شێخ عەبدولسەلام بارزانی بەرهەڤبوون و هەڤسۆز و هەڤخەمێن مە بووین."

سەرۆک بارزانی د هەمان دەم دا سوپاسییا هەمی بەرپرسێن حکومی و ئالییێن سیاسی، ئەندامێن جڤاتا نوینەرێن ئیراقێ، کەساتی و سەرۆکهۆزێن ئیراق و سووریێ، هەروەسا بەرپرس، کەساتی و نوینەرێن وەلاتێن عەرەبی و کەنداڤی، کەساتی و ئالییێن سیاسی یێن پارچەیێن دی یێن کوردستانێ و رەڤەندا کوردستانی ل دەرڤەی وەلاتی کر کو ب رێیا بروسکە، پەیامێن هەڤخەمییێ و پەیوەندییێن تەلەفۆنی زەحمەت کێشا و د تازی و خەما مە دا پشکدار بوون.

سوپاسییەکا تایبەت ئاراستەیی وەلاتییێن خۆشتڤی یێن باژێرێ پیرمام کر کو د رۆژێن تازییێ دا، ل گەل هەبوونا زەحمەتی و قەرەبالغییێ، مێهڤاندارییا خەلکی کر. هەروەسا دەستخۆشی ل ئەرک و ماندیبوونا هێزێن ئاسایشێ و پۆلیسان کر کو بەرپرسیارییا رێکخستنا هاتنوچوونێ و پاراستنا وەلاتییان ل سەر ملێن وان بوو.