گاڤ

ل گۆرەی نڤیسارا رێڤەبەرییا گشتی یا کار و دەستەبەرییا جڤاکی یا ژمارە (11711 ل 2026/09/03)، بەلاڤکرنا وێنە و ڤیدیۆیان ل گەل کرێکارێن بیانی یێن خزمەتگۆزارییا مالان هاتییە قەدەغەکرن.

ئەڤ بریارە بۆ وێ چەندێیە کو وێنە و ڤیدیۆیێن ڤان کرێکاران بێ-رازیبوونا وان و ب مەبەستا بەلاڤکرنێ د تۆرێن جڤاکی دا نەهێنە بکارئینان و کەرامەت و تایبەتمەندییا وان نەبیتە بابەتێ ناڤەرۆکا سۆشیال میدیایێ و بازرگانییا ئەلکترۆنی.

ل گۆرەیی نڤیسارێ، کرێکارێن بیانی یێن خزمەتگۆزارییا مالان، هەرچەندە ژ وەلاتەکێ دی هاتینە، لێ مافێن وان یێن مرۆڤی و کرێکاری هەمان ئەو مافە نە یێن کو دڤێت بۆ هەر کرێکارەکێ دی بهێنە بەرچاڤوەرگرتن. نابیت جوداهییا نەتەوە، زمان یان جۆرێ کاری ببیتە ئەگەرێ بنپێکرنا کەرامەت و تایبەتمەندییا وان.

ئەڤ گاڤە پەیامەکا رۆهن و ئاشکرایە کو نابیت وێنە و ڤیدیۆیێن کرێکاری ببنە کەرەستەیێ ریکلامێ، سوحبەتان، دروستکرنا ناڤودەنگییێ یان ژی بەرنامەیێن سۆشیال میدیایێ.

پاراستنا مافێ کرێکاری تنێ ب پێدانا پارەی و دابینکرنا کاری ب دویماهی ناهێت، بەلکو پاراستنا کەرامەت و تایبەتمەندییا کەسی، مافەکێ سەرەکییە.

د نڤیسارێ دا هاتییە، "نابیت ل دەرڤەیی پەیوەندییا کاری کو ل گۆرەیی گرێبەستێ هاتییە رێکخستن، کرێکار بۆ بابەت و کارەکێ دی بهێتە نەچارکرن". بۆ ڤێ مەبەستێ، "دڤێت رێڤەبەرییێن پەیوەندیدار رێکارێن یاسایی بەرانبەر سەرپێچیکاران بگرنەبەر."

ئارمانج ژ ڤێ ئاگەهدارکرنێ، "پاراستنا مافێن مرۆڤی و رێزا کرێکارێن خزمەتگۆزارییا مالانە، هەروەسا رێگریکرنە ل بکارئینانا نەیاسایی یا وێنە و ڤیدیۆیێن وان بۆ مەبەستێن بازرگانی و ریکلامێ" ئەڤە ل گۆرەیی نڤیسارێ.

ئەڤ بریارە پشتی وێ یەکێ هات، د هەیاما بۆری دا هژمارەکا وەلاتییان د تۆرێن جڤاکی دا، خزمەتکارێن مالێن خۆ ل تۆرێن جڤاکی بەلاڤدکرن و نەچاردکرن بۆ کامیرەیێ بئاخڤن.