گاڤ

رێڤەبەرییا پۆلیسێن پارێزگەها دهۆکێ راگەهاند کو ئەو چار کەسێن دوهی هێرشکریە سەر پارێزەرەکی ل قەزا شێخان، ئەڤرۆ هاتنە گرتن و دێ رەوانەیی دادگەهێ هێنەکرن.

ل گۆرەی راگەهاندنەکا پۆلیسێن دهۆکێ کو ئەڤرۆ سێشەمبییێ 8ێ ئیلۆنا 2026ێ، بەلاڤکریە، دوهی ل سەنتەرێ قەزا شێخان ژ ئەگەرێ ناکۆکییەکێ، چار کەسان هێرشکرە سەر پارێزەرەکی ل نڤیسینگەها وی یا تایبەت. پشتی کو هێزێن پۆلیسان هاتینە ئاگەهدارکرن و سکالا یاسایی هاتییە تۆمارکرن، ب فەرمانا دادوەرێ ڤەکۆلینێ ئەڤرۆ هەر چار تۆمەتبار هاتنە گرتن.

پۆلیسان ئاماژە ب وێ چەندێ ژی کریە، ڤەکۆلین دێ ل گەل تۆمەتباران هێتەکرن ل گۆرەیی بەندێ (405/31) ژ یاسایا سزایان و پاشی دێ هێنە رەوانەکرن بۆ دادگەهێ دا کو سزایێ خۆ یێ یاسایی وەربگرن.

دەبارەیی ئەگەرێ ڤێ رویدانێ، دوهی وی پارێزەری بۆ سازییێن میدیایی ئاشکرا کربوو کو بەری هەیامەکێ، وی کەیسەکا وان تۆمەتباران ل دادگەهێ برێڤەبربوو. لێ پشتی کو پارێزەری داخوازا پارەیێ خۆ ژ وان کری، ئەو کەس چوونە سەر نڤیسینگەها وی و هێرشی وی و برایێ وی کر.

د ئەنجامێ وێ هێرشێ دا ل گۆرەیی گۆتنا پارێزەری، برایێ پارێزەری برینداربوویە و بۆ وەرگرتنا چارەسەرییێن نۆشداری بۆ نەخۆشخانەیێ هاتییە ڤەگوهاستن.